|
O Reggae, o Rock, a Rumba, a Samba, o Funk e os éxitos do verán, esta é a
identidade sonora de Lamatumbá, que a presenta como unha das propostas
máis frescas e novedosas do actual panorama musical. A forza do seu
directo ten chegado a festivais e salas de Galicia e de todo o estado.
En Xuño de 1998 preséntase no seu primeiro concerto, unha noite memorable
no mítico Moucho de Ourense. Ese verán os membros do grupo participan na
dinamización musical da Feira das Mentiras, organizada por Manu Chao. A
experiencia actúa como impulso para a banda, nace Lamatumbá.
Durante 1999 consolídase a primeira formación. Ico á voz, Manolo Potone ó
baixo, Ángel Gafas ó clarinete e gaita, Tonillo á guitarra, Manolinho na
percusión, Jaime Mateo na batería e Samuelito na trompeta e frauta.
Continúa a xira de concertos por toda Galicia, actuando en máis de vinte
escenarios.
En Maio de 2001 edítase o primeiro disco, "Pachangüilanuí", co selo
Xingreira. "Licor Café", un dos temas da grabación, inclúese na banda
sonora da serie de TVG, Terra de Miranda. Neste tempo son compañeiros de
escenario de Manu Chao, Mau Mau, Hechos Contra el Decoro e Nilo M.C.,
entre outros moitos.
No 2003, cen concertos despois, iníciase unha nova etapa coa entrada de
Pedro Feijoo (Los Feliz) e a grabación de cinco novos temas, que pronto
verán a luz formando parte dun novo Cd.
A formación actual está composta por: Ico na voz, Ángel no clarinete,
Samuelito na frauta e saxo, Puntxa nas percusións, Txitxas na batería,
Cris Asenjo no acordeón, Pedro Feijoo no baixo, El Niño na guitarra e Toño
Moucho na guitarra eléctrica.
Lamatumbá é un proxecto multiartístico, aberto ás xentes do teatro e da
literatura, presente en asociacións e diversos proxectos culturais. Sempre
activo, en movemento. O conto dun camiño que nunca se deixa de percorrer.
Un grupo galego que sona a mundo
|